上周六澳職榜首大戰，西悉尼流浪者（圖）主場迎戰墨爾本勝利。今季大翻身嘅西悉近況大勇，今場對住上屆總冠軍勝利，踢到下半場九分鐘終於打破僵局，由馬克布歷治近門接應卡斯迪倫橫傳搞掂；卡斯迪倫喺79分鐘再次右路發難，自己都入番粒奠定2:0勝局，助西悉七連勝穩坐榜首。勝利輸波，連積分榜第二位都保唔住，皆因布里斯班獅吼同日主場2:1反勝威靈頓鳳凰，反壓勝利上第二，落後西悉四分。