大約兩個禮拜前嘅一個星期六，陳太（陳方安生）應邀返回母校香港大學參加討論會，講本港政治之類啩，並與港大社會科學院院長對談，點知港大學生準時到場嘅，聽講只有兩三個，陳太見場面冷清成咁，大為掃興，教授亦無癮，於是對談會臨時取消。消息傳出後，有報紙取笑陳太對學生已無吸引力，反而梁振英出席一個青年講座，有二百幾名青年參加。
咁樣對比，係幾大笑話。梁振英出席任何講座，必定有人前呼後擁，組織單位一定出齊辦法在圍內宣傳，拉人參加，但港大學生會係一個鬆散組織（全港大學學生會都係），除咗搞大型政治示威時有人瞓身去組織之外，平時啲甚麼學術、社會政治講座、論壇，都幾難搵到幾十名參加者，香港本地大學生有太多嘢搞，星期六早上可以去補習搵錢，可以去行山打波拍拖，可以在宿舍瞓到日上三竿，邊度得閒去聽陳太與教授對談呀，其實陳太係對母校太大熱情啫，如果係第二間大學學生會搵佢，相信佢會一早推咗，之不過港大生對港大校友猛人都唔俾面，以後都係無謂浪費時間。
十幾年前，左丁山自告奮勇，組織十位八位中環校友，皆是CEO、CFO、HR董事人馬，齊齊返中大講「求職心得」，希望幫應屆畢業生增加商場求職知識常識。點知在一個星期六下午，講室內台上熱鬧過台下，到場學生唔夠十個八個，場面冷淡，大家非常冇癮，一位CEO對左丁山講：「喂，我地班人嘅management time計起條數，好貴嘅噃，以後唔好叫我返嚟嘞。」結果搞到左丁山要請飲茶賠罪。問番大學人士，佢地話啲中大學生好忙嘅喎，星期六下午難得有空，更難以出席聽career talk。
最近問番一啲大學人士，佢地話搵本地大學生聽學者演講係幾艱難，外國著名學者，攞過諾貝爾獎嘅，先至叫做有啲號召力，但即使係諾貝爾獎人物演講，在座嘅學生亦多數係內地生，發問者，亦多數係內地生，總之本港學生不知何故，對學術講座總係冷冰冰，或者佢地覺得上網仲學到更多嘢都未定。左丁山在大學時代冇電腦，冇手機，卡式錄音機係新發明高科技，讀書讀雜誌係最大消閒活動（或者因為咁，吳局長話每月看30本書或刊物，不知是否壹週刊之類），所以有時間去聽演講，但嗰陣時冇乜世界級人物來港演講，偶爾聽到牟宗三先生演講大罵毛澤東，就聽出耳油咯。