「拍了大概一個月我們就殺青了，之後的三四個月我沒有辦法做別的工作 。」
嚟自雲南嘅春夏喺新戲《踏血尋梅》一鳴驚人，早前已經喺「富川國際奇幻電影節」拎咗最佳女主角同入圍金馬獎最佳新演員。導演翁子光面試咗近200人，一搵到春夏，未正式見面就認定佢係女主角「佳梅」。首次擔正就要全裸做援交少女，春夏就覺得冇咩大不了，指導演一邀請就即刻應承，「我根本沒有設心理防線，可以很輕鬆走出去 。」反而係角色心理背景同遭遇太沉重，令佢太投入，拍完幾個月都未平服心情，「（拍完）之後的三四個月，我沒有辦法做別的工作，對這個世界，和很多東西的認識還是在電影的眼光和想法裏面。」其中同白只嘅床戲，亦都係成套戲最重要嘅一場戲，令春夏最難忘，「兩個人只見過一次面，你要在一場戲表現出你跟一個人已經打造成互相信任，可以把生命交託給對方的關係，我覺得是很難的事情 。」
採訪：何永寧、黃芷蔚 攝影：葉君海、馮峰、廖達燊
「我覺得香港是一個非常美好，但非常難以接近的城市 。」
《踏血尋梅》帶出嘅其中一個問題，係內地少女初來港要融入社會嘅壓力，而因為拍戲第一次來香港嘅春夏，就覺得香港係一個壓力大嘅地方，「 他們走路很快，令我覺得快要遲到了。」佢話唔係指被香港人排斥，只係因為言語問題令自己有種孤獨感，「我很快就體會到那人物（角色），第一次來香港，她想融入這個地方，但語言不通給人感到很大隔閡感 。」雖然角色遭遇不幸，但佢覺得戲中結局係「求仁得仁」，未嘗唔係一件好事。
「我是一個做事情堅持有自己想法，而且沒有那麼柔和的人 。」
春夏指佢個名係來自兩個非常美好嘅季節，「我希望自己是一個非常女性化非常溫柔非常可愛的女孩子．．．．．但其實我不是 。」春夏鍾意聽廣東歌，鍾意食香港勁辣魚蛋，但暫時未諗將來喺邊發展，「我是個不太會做計劃的人，會發生甚麼事就按那個事情去做。」
場地提供：小房子