特首梁振英同黃家強合唱片段鬧出涉違反版權條例疑雲，搞到特首辦要急急補鑊買番個版權。網民隨即「網摷」建制派疑似侵權嘅紀錄，CY可謂累街坊！連工黨何秀蘭（Cyd）噚日都捉住立法會主席曾鈺成，話佢結婚當晚唱歌𠱁老婆可能侵權！
話說Cyd噚日捉住曾主席，提番對方當年結婚（圖），喺婚禮上唱《仙樂飄飄處處聞》插曲《Something Good》𠱁老婆一事，仲睇死曾主席當時冇攞版權，如果有網絡23條，曾主席都可能同CY一樣隨時「唔得掂」！
Cyd透露曾主席笑笑口認冇攞版權，但主席即係主席，借機話民建聯籌款時，譚耀宗唱《舊歡如夢》唔知有冇攞版權呢？仲叫Cyd問問譚耀宗，咁就將個波踢咗畀黨友！
譚耀宗明顯唔係好知當年唱《舊歡如夢》有冇申請版權，話要問問同事，但就話以往民記搞大型活動都有拎版權，只係有時內部嘅、唔出街嘅，先冇申請。佢仲更正八方，呢啲版權問題一直存在，唔關網絡23條事。而葉國謙事後同八方講，當年譚耀宗唱《舊歡如夢》時，係有畀版權費嘅。