【文化籽】香港陸沉做戲咁做？　十年後狂想曲

【專題籽：影人影事】
十年，可以是念念不忘，一齣羅生門重翻舊案；十年，亦可以帶來人事幾番新，面目全非大變天，放諸香港，未來十年後，又會是如何境況？從2015年走到2025年，有人堅信世界末日會降臨；亦有人懼怕香港會陸沉，憂心未到2047年，已經提早淪陷；不過亦有人樂觀積極、阿Q精神，認為現時香港已經衰到貼地，相信十年後可從谷底反彈。未來的香港，2015 亞洲電影節推介電影《十年》也許能為你帶來啟示，加上幾個真．香港人的所思所想，譜出香港未來十年狂想曲。不過驟耳聽來，這似乎是首赤色哀歌，我們會選擇掩耳盜鈴，抑或力爭編曲改詞的自由？

《十年》導演周冠威：「唔想見到荒謬嘅將來，就要坐言起行，唔好等到為時已晚先後悔。」

電影《十年》由五個故事組成，其中四位導演受訪時不時流露對香港未來的擔憂。

《十年》由五個七、八、九十後導演擔大旗，各自將十年後幻想搬上大銀幕。無獨有偶，五個故事均散發濃濃哀愁，光影之中盡顯灰暗、心寒、以及未如人意的無奈，令人揪心，對照當下，其實一切有迹可尋。導演之一伍嘉良說：「我們嘅故事好似去到好盡，將一個睇落好似好荒謬嘅將來，放在觀眾面前，但其實回想番香港呢幾年，不單只政治，就連關乎民生嘅事，都荒謬如日常，例如鉛水事件、TSA。」當下，整個社會游離於掙扎與樽頸，「抗爭唔係未試過，又唔係冇反對聲音，又成日拉布同剪布，但點解現實仲係咁令人失望。」電影以沉重方式表達，是五位導演的默契，亦是對現況的無可奈何。另一導演周冠威直言：「香港要搵出路，係需要承認絕望及困局，承認呢個世界很反智、很荒謬，如果只係識自欺欺人，何來講轉變呢？」眼見政制與民生雙雙陷入困局，他們盼作品能引起反思共鳴，「唔想見到荒謬嘅將來，就要坐言起行，唔好等到為時已晚先後悔。」但時代風雨飄搖，絕望之中可見曙光？他們心灰之中仍存信念，「為時未晚應該是一種常抱態度，不過點樣解決，就留番畀大家思考。」導演黃飛鵬亦說：「正如很多其他導演所言，十年有好多嘢會變，但我最怕係我哋坐喺度不變，人心不變，咁所有嘢都無法改變。」

文學講師歐陽偉豪：「最怕十年後，連落街買份報紙都要用普通話，又好怕一街高樓大廈嘅招牌全部都係用殘體字。」

人稱Ben Sir的中文大學中國語言及文學系高級講師歐陽偉豪，平日古靈精怪，曾在大台公仔箱扮鬼扮馬笑談廣東話，謝絕古板嚴肅，全因希望成功將中文帶「入屋」，但當字海也漸被染紅，廣東話及繁體字險失主場時，Ben Sir 嘆喟：「最怕十年後，連落街買份報紙都要用普通話，又好怕一街高樓大廈嘅招牌全部都係用殘體字……唔想變成咁，但中港融合，十年後究竟仲有幾多香港人講廣東話，寫繁體字呢？」身為中文人，對於近年糾纏不休的繁簡之爭，他尤其金睛火眼，早前香港大學的語言研究報告，開宗明義鼓勵港府推廣普通話，更令他火燒心，「個報告話三成人識簡體字，所以要學普通話。個問題係，究竟三成係為之多定少呢？到時全個城市嘅影像都變晒簡體字，又係咪我哋需要㗎呢？」
十年雖未到，但粵普攻防戰已經殺埋身，普教中強勢硬着陸，港府不承認廣東話是法定語言，要守住這條本土陣線，Ben Sir大嘆唔係得個講字，「成日都話要撐廣東話，唔好再淨係嗌口號啦，行動先係最實際！」他認為，港人與其死守，不如趁有氣有力時，將廣東話與更多文化事業互相緊扣，提升地位，「改變唔到外在環境，就要識得爭氣。」話雖如此，現實卻是鐵一般的無情，本土電影在合拍片的洪流裏逐漸淹沒、娛樂圈只剩下日韓星、本地薑在主場也要靠邊站、撈電視汁也要靠大陸進口，廣東話豈非要舉定白旗，投降認輸？佢話未必咁絕望，港人是醒目仔女，活用廣東話至極，名人棟篤笑、talk show場場爆滿，觀眾笑到開巷，正因廣府話夠核啜抵死；他又認為YouTuber等網絡紅人，掌握數百萬點擊率，絕對堅揪，更可以穩住廣東話半邊天，「好多YouTuber爆紅、上位，都係妙用廣東話搞gag講笑，邊有講普通話嘅YouTuber成功彈出吖？」慶幸網絡之大，存活一絲空間，讓正宗本土出品氣昂抬頭。
他又忽發奇想，提出一個惡搞考評局的絕世好橋，號召已上岸的大學生集體挑機，報考文憑試（DSE）通識科，並以廣東話及口語作答，擺明車馬衝擊考試制度，「同樣嘅作答內容，你寫『我的書』我寫『我嘅書』，會唔會都拎到5**呢？」這個玩味十足的念頭，未必撼動到教育高牆，但至少能夠製造新聞輿論，甚或可藉此強迫政府表態，「想睇吓廣東話可唔可以登上考評局同教育局嘅大雅之堂，通識科又唔係考語文能力，如果寫廣東話會扣分，咁理據係喺邊度呢？」
自己語言自己救，他認為要捍衞廣東話，並非進入瀕死狀態，才來急急搶救，「就算十年後冇事，港人都要keep住做嘢，傳承呢種文化。」十年人事幾番新，中港融合，港紙變人仔唔係冇可能，但廣東話源遠流長，「如果連呢種文化都冇埋，到時香港真係面目全非！」他渴望港人企硬，堅守底線，莫讓這個噩夢實現。

中大講師歐陽偉豪來到尖沙嘴廣東道，笑說最怕以後只聽見一街「鳩嗚」之聲不絕於耳。

惹火烈女翁靜晶：「十年之後，新界會變成連接中港的金融中心，成個香港則變成科技世界，冇晒人情味。」

翁靜晶（Mary），做過演員，見盡風花雪月，跳出大染缸後，走進保險及法律界，性格直腸直肚，有嗰句講嗰句，堪稱惹火烈女，近年其不平則鳴個性越見鮮明，替亡夫劉家良向邵氏追花紅、出律師信cut有線、聲討強國人在迪士尼打尖，句句到肉，吃花生網民冇不拍爛手掌，她近月更智破定慧寺糊塗賬，揭發尼姑和尚假結婚，驚險又離奇。搵佢聯想十年後香港景象，想必火花四濺，估不到在訪問中，卻是負面能量滿瀉。
十年想像，無窮無盡，但她不看好前景，更直言不予厚望，全因沒有最差，只有更差，現時本港衣食住行樣樣令人憂心，飲啖水、食豬肉都要提心吊膽，搵屋住則猶如揸頸就命。中港加速融合，香港人與新香港人界線日漸模糊，她腦海中，十年之後，新界會變為連接中港的金融中心，成個香港則變成科技世界，冇晒人情味。香港將經歷經濟洗牌，新界鄉郊遍野不再，小店壽終正寢，換來條條步行購物街，「睇吓大陸需求係啲乜，如果係尿片，就一街都係賣尿片。」大時代變更，尤其面對大陸的一聲令下，逐步赤化難以逆轉，「講到明五十年不變啫，但唔係永恆不變，香港只係中國其中一個城市，冇可能國中有國，係好欷歔，但都冇辦法。」
有些事情，即使着急，也無能為力，但她認為，走歪路的教育風氣尚來得及改變。十年之後，走進科技智能大同，Mary認為，小孩子活在再沒有手寫字的世界，「但考試仲係需要手寫，結果個個寫得極慢，明明識答都唔識寫，分分鐘考到一半已經手抽筋。」孩子被科技主宰生活，「唔會相信以前係冇電腦，唔會識得去圖書館用索書號搵書，唔會識得透爐撻火，一切都係手到拿來。快樂童年亦被掏空，家長催谷變本加厲，眼見現時八歲姪女課外活動多不勝數，她嘆為觀止，亦滴晒汗，「十年之後，小朋友可能不只要十項全能，仲要二十項全能，個個細路仔變晒家長捉棋博弈工具。」能否臨崖勒馬，關鍵在於當刻可否將劇本改寫，不過她不甚樂觀，「想預見未來，睇番歷史就知道，除非𠵱家有重大改變，否則都冇理由會覺得十年之後會有乜嘢憧憬。」同是香港人的你，又點睇呢？