【本報訊】樓市低迷，凶宅極速冧價。轟動全港的荃灣中心太原樓「六屍凶宅」，同層終錄得逾兩年來首宗成交，正正在凶宅王隔籬單位僅以「七折價」228萬元平賣，實呎不足7,000元，平過新居屋。連六屍凶宅業主的「鬼王」陳應佳都話平，佳叔直言「唔等錢使」，暫無意放盤。
記者：朱連峰
太原樓4樓G室在1996年被揭發六屍慘案後，此層自此變得生人勿近，連睇樓都無人敢來。凶宅隔籬的E室單位大劈價三成才賣出。單位實用面積329方呎，上月底獲買家以228萬元承接，呎價僅6,930元，低市價三成。今年開售的同區新居屋尚翠苑，最平售價逾240萬元。受凶案影響，4樓全層8個單位不獲銀行估值，參考樓上5樓E室估值，恒生銀行估值達321萬元，中銀則估值302萬元。
10月放盤曾叫280萬
美聯物業梁仲維表示，今次低價易手六屍鄰戶單位，今年10月已經放盤，叫價280萬元，由於同層曾發生轟動命案，完全沒有人敢到同層睇樓，形容「講都冇人敢制」，至上月底已傳出單位易手，當時估計最平都要250萬元，但估不到竟低至228萬元。原業主2012年3月以160.2萬元購入單位，仍賺68萬元，升值42%。
持有六屍凶宅的業主陳應佳也稱，「呢個價都算平，相信係業主等錢使至會平賣。」他直言，市況淡靜，現時業主如果想賣樓，不平根本無人會買，等錢使就要平賣，不等錢使就收租。其持有的六屍盤，佳叔稱，市況不好，暫時不會賣住，況且日日有租收，現每月收租9,500元，租客是一名女天主教徒，一個人住，「教徒唔怕㗎，唔信啲牛鬼蛇神，凶宅唔係人人驚，有啲人見到死曱甴都驚。」加上凶宅是早年買下，2011年5月購入價僅118.5萬元，收租回報近10厘，「唔等錢使，賣咗啲錢又唔知用嚟做乜，銀行無息收，所以現時策略係，揸貨好過揸錢」。
香港置業余柏表示，美孚新邨1期百老匯街25號高層A室凶宅，實用700方呎，今年8月原以743萬元賣，但買家撻定，剛僅以615萬元重售，呎價8,786元，三個月賣平17%，比市價平兩成，銀行估值逾770萬元。據知上址17年前曾有人跳樓身亡。這層還不止一間凶宅，同層一單位今年亦有人跳樓身亡。
樓價指數見40周新低
中原城市領先指數CCL最新報138.22點，按周再跌1.14%，創40周新低。利嘉閣何振榮稱，青衣盈翠半島大戶失守千萬，1座高層A室售996.8萬元。
豪宅再見血。元朗葡萄園洛圖大道單號屋售2,650萬元，原業主2010年以2,577萬元購入，連使費料蝕約50萬元。