「一人一票，機不可失」，咦？區議會選舉完咗好耐，又呼籲投票？講緊係2016年NBA多倫多明星賽，NBA由周四起開始接受投票，湖人後衞拜恩（Kobe Bryant）可唔可以第18次兼最後一次入選明星賽，就要靠球迷支持喇。不過，球隊將佢列入前場組，要挑戰安東尼戴維斯（Anthony Davis）、比歷克格芬（Blake Griffin）等新晉球星真係唔易。
總裁施華幫到出面
37歲嘅拜恩宣佈季後退休，佢嘅比賽睇一場少一場，以往佢喺明星賽有過唔少經典事迹。坦白講，以拜恩今季只得15.9分同3.2次助攻嘅表現，如果冇份打正選，要一眾西岸教練選佢做後備都幾難，所以就要靠個人魅力吸引球迷投票喇。連NBA總裁阿當施華（Adam Silver）都話：「我希望到時見到拜恩，佢係歷史上最偉大球員之一，值得光榮退休。」不過湖人唔知係咪靠害，Kobe上季受傷患困擾，都拎到115萬票排西岸後衞組次名，只係最終因傷退出，但球隊今季就幫佢報上前場組。雖然正選有三個位，但對手好勁，好似塘鵝前鋒安東尼戴維斯，上季係第一位有136萬票，加上「入樽王」比歷克格芬、傷癒嘅杜蘭特（Kevin Durant）等，唔易爭㗎。
明星賽由即日起至下年1月19日喺vote.nba.com接受投票，球迷仲可以上佢哋官方twitter、fb、ig投票，國內球迷亦都可以用微博、QQ投，而且仲唔限兩名後衞同三名前場呢個規定。第一輪投票結果喺12月16日公佈。
