新一套《星球大戰7：原力覺醒》，下星期就上畫，香港有唔少《星戰》迷，宣傳工作就梗係重本，好似旺角都有大型海報宣傳。不過講震撼，就要學吓保加利亞球隊索菲亞中央陸軍（CSKA Sofia），周四佢哋一場盃賽，賽前就安排大型《星戰》打氣活動，多謝黑武士同白兵保佑，中央陸軍就以3:0大勝對手晉級。
兩萬球迷變身白兵
索菲亞中央陸軍都算係保加利亞傳統強隊，贏過31次保甲冠軍，但上季因為財政問題被踢去丙組，好彩球迷對中央陸軍都不離不棄，球隊現時排丙組西南區榜首，保加利亞盃亦都有好表現，周四八強大戰主場對乙組嘅索佐普爾，都有近兩萬球迷入場支持。賽前佢哋都同《星戰》Crossover，除咗拉起大型黑武士同白兵橫額外，一眾球迷就高舉白兵紙牌，而且將CSKA四個英文字融入《星戰》主題曲度大嗌，最後放埋煙花，場面都幾震撼㗎。有咁熱情嘅球迷支持，球隊都好落力，憑住尤丹洛夫梅開二度，主場大勝3:0晉級殺入四強，唔知下場準決賽會唔會玩天行者呢？
雖然《星戰》係美國電影，不過喺歐洲都一樣好hit，好似九月歐霸盃分組賽費倫巴治主場對莫迪，費倫巴治球場亦砌上「原力覺醒」英文名「The Force Awakens」字樣，不過今次黑武士就幫唔到手，呢場波費倫巴治就輸1:3。