龍叔叔放完幾個禮拜假，早過吳克儉去富士山睇完紅葉，跟手幾乎日日匿喺屋企煲碟叉電，《職業特攻隊5：叛逆帝國》、《未來戰士：創世智能》、《屈機起格命》等，都好耐未試過排住隊煲碟又唔使開工咁過癮喇。本來諗住寫吓五十幾歲嘅湯告魯斯，喺戲內點樣鍊盡寶馬啲車，不過臨寫前，旺角DVD Pro老闆Andy又打嚟，話《蟻俠》Blu-ray到咗喎，Marvel喎，無敵CG喎，龍叔叔冇得唔撐啦。
對比Iron Man同美國隊長，龍叔叔同好多冇睇開漫畫版嘅港人，都對蟻俠較陌生，不過諗起主角縮細變粒蟻時，已經好期待微縮世界戰爭嘅新鮮感。事實上，《蟻俠》動作場面不算密集，都係以文戲為主，不過幾場打鬥戲都睇到劇組嘅心思，好似主角縮細深入蟻竇「號令」群蟻，學習點樣馴服班蟻民，成千上萬隻好似大笨象嘅工蟻撲埋嚟，壯觀得嚟都幾嚇人，對小昆蟲敏感之人，可能會有不安情緒，邊睇邊不自覺咁頴吓隻手。另一幕火車軌場景模型內大戰都值一讚，微縮世界下，個樣本身已經有啲詭異嘅Thomas火車頭，發盡力咁衝埋身邊，加上3D立體效果同DTS-HD MA音效，真係幾嚇人，跟手畀蟻俠轉手掉出窗口，正等待沉重嘅撞擊聲同爆炸火花出現時，鏡頭一拉變遠景，其實都只係一件小玩具近乎無聲咁撞落玻璃窗啫，跟手鏡頭又拉番去微縮世界好激烈咁打鬥，呢種小人喺大世界嘅影音衝擊，正正帶出咗人類喺呢個世界甚至全宇宙，其實都係渺小如塵，都幾得意。
影帝助陣 第一代蟻俠最好戲
睇番製作特輯，知道CG技術幾勁都好，微距拍攝都係一項大挑戰，好多都堅係用微距鏡頭拍攝真實場景，之後加人物落去，所以成套片唔會有種太假嘅CG味，再戴埋立體眼鏡睇，令觀眾有種更真實嘅縮細感。好似蟻俠被困浴缸，損友唔知情開大水喉，喺蟻俠嘅世界就好似遇到洪水海嘯咁大鑊，而且因應番水嘅張力，濺起嘅唔係水花而係大大粒水珠，呢啲真實感絕對係有諗過嘅部署，而非一味靠CG特技去堆砌出嚟。睇完之後，忽然對蟻產生好感，以後見到都會小心避開。
睇特技片都係想娛樂吓啫，若文戲過多，好易搞到人瞌眼瞓。由於《蟻俠》第一次拍成電影，難免要交代前因後果同其他鋪排，預咗文戲會多啲。好彩有龍叔叔勁欣賞嘅男神兼奧斯卡影帝米高德格拉斯壓場，飾演第一代蟻俠兼復仇者始創人之一嘅Dr. Pym，培訓主角成為接班人。米高由頭到尾都咁好戲，好似語重心長咁說服偷嘢為生嘅主角，為個囡囡去拯救世界一幕，講嘢細聲又慢吞吞，不過就係呢種個人魅力，居然有本事吸引住觀眾耐心咁聽落去，文戲同武打，《蟻俠》都算水準之上兼有新鮮感。
龍叔叔稍稍不滿嘅，係劇情唔算豐富，成套戲主要都講點樣爭奪蟻俠嗰套放大縮細嘅戰甲，反而埋咗好多未來同復仇者聯盟反面、仲有下年上畫嘅《美國隊長3》伏線。仲有唔多滿意大壞蛋唔夠奸兼冇料到，搞到壓軸打鬥場面帶唔出高潮。不過龍叔叔認為，真正嘅高潮戲係主角自我犧牲，縮到原子咁細粒去破壞終極boss嘅身體。大局已定後，主角漂浮喺原子嘅世界，視覺衝擊都幾震撼，最後因為不停聽到個囡囡呼喚，諗到絕橋變番做一個正常人，呢一幕都幾似《星際啟示錄》㗎。
Profile：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie ）
編輯：謝慧珊
美術： 楊永昌