英超爭氣呀！利物浦同熱刺喺歐霸盃分組賽齊齊以首名過關，同曼聯一齊被列為種籽隊，嚟緊將會一齊出戰32強。喺周四嘅尾輪分組賽，雖然熱刺收起咗哈利卡尼等主將，半力出擊，但都夠搞掂摩納哥。拉美拿呢場踢到曉飛，上半場就帽子戲法，幫熱刺領先3:0，雖然摩納哥靠艾沙拉維破蛋，但熱刺嘅湯卡路爾臨尾入多粒，為球隊鎖定主場贏4:1。熱刺踢完六輪有13分，以三分壓過安德列治，得J組首名。至於B組嘅利物浦就作客悶和錫永0:0，紅軍以一分力壓對手，獲得首名出線。計埋喺歐聯分組賽得第三嘅曼聯，今屆歐霸盃32強有三支英超球隊，全部都係種籽隊。喺今屆歐聯同歐霸，西甲最威，總共有七支球隊打入淘汰賽，而德甲同英超一樣有六支。