立法會示威區大前日發生垃圾桶縱火案，不過班議員似乎唔多怕！噚日立法會舉行定期火警演習，議員表現勁hea，有人未等火警鐘響率先「逃出」立法會去食晏，有人搭𨋢走火警，難怪立法會主席曾鈺成要就今次「火警」，宣佈「議員受傷嘅3人，失蹤嘅50人」，乘機揶揄班議員！
議員有幾hea？好似一向好火氣嘅財委會主席陳健波，未等火警鐘響，率先「逃出」立法會；新民黨田二少就同人力「大嚿」陳偉業、公民黨陳家洛一齊搭𨋢，大嚿率先去到集合區，田二少直情直落停車場走人。
曾主席︰返會議室唔見你咁快
曾主席揶揄大嚿，「返會議室唔見你咁快？」大嚿就反擊主席，叫佢不如將議會點人數鐘聲，改成火警鐘，但主席冇中計，笑住反駁：「咁到時啲人咪走晒出公園？」
搞咗一輪，建制派班長、民建聯葉國謙同馬逢國姍姍來遲，成為「壓軸」議員。但加埋阿謙，參加火警演習嘅議員都只有十人，大嚿話唔夠立會開會法定人數，要求曾主席宣佈走火警無效，要「重新走過」，主席只好「宣佈」今次火警演習有3名議員「受傷」、50名議員「失蹤」。獲邀到場視察嘅港灣道消防局隊長何Sir就話，噚日立法會500幾人走火警，約10分鐘就完成，算係「好快、好理想」。
李八方
mailto:[email protected]