全球期待《星戰‧原力覺醒》(星戰7)即將上映,大家除咗擔心第一時間撲唔到戲飛之外,最關注嘅梗係《星戰7》講乜啦!一日未上映,全球fans都有唔同嘅揣測同睇法,唔知香港fans又點睇呢?
傳言篇:
有傳《星戰7》女主角與疑似反派Kylo Ren可能係雙生兒,訪問當日,Cosplay飾演Kylo Ren嘅Chris話:「女主角與Kylo Ren有可能係兄妹或姊弟關係,我都期望呢樣嘢係真,因為有呢個關係嘅話,劇情會更緊湊。」至於點解有呢個傳言呢,30年《星戰》迷Edmund話:「外傳小說入面,Han Solo同Leia公主嘅雙胞胎,以前叫Jaina Solo 同埋Jacen Solo。男嘅去咗黑暗方,所以有人推測Kylo Ren就好似外傳小說咁,可能係Han Solo同Leia公主嘅仔。」
預告片中有一幕女主角攬住一個疑似Chewbacca嘅物體喊得好慘,有人推測Chewbacca可能會死。20年《星戰》迷Kin表示:「我當然好傷心啦,其實我好鍾意呢個角色,雖然佢冇咩對白,但佢係靈魂人物之一。」14年《星戰》迷Danny話:「我覺得好似少咗個老朋友咁,由細睇到大,如果無啦啦消失,會好心痛。」
意見篇:
被問到如果有一個角色要死,會係邊個時,Edmund話希望係Jar Jar Binks:「大部份Star Wars fans都唔鍾意佢,因為覺得佢好煩好討厭。」Chris就反而覺得係Han Solo:「其實佢(夏里遜福)曾經表示唔想繼續拍落去。」
以往《星戰》都係由男性主導,今次由女性擔正,男fans睇得開心,女fans更加興奮。愛上《星戰》16年嘅女fans Carmen話:「今次女仔做主角絕對係好事,因為《星戰》本來就男fans遠多於女fans,如果有女性擔任主力角色,可以增加fans令電影更豐富。」14年星戰迷Danny仲話,如果可以嘅話下次搵個華人做主角仲開心,而佢會揀古天樂,因為真係好靚仔。
期望編:
其實飾演天行者嘅Mark Hamill,十幾年前喺電視節目《Dinner For Five》入面,都講過想天行者入魔,因為作為一個演員,覺得咁樣較有挑戰性。30年《星戰》迷Edmund話,講天行者入魔要追溯到90年代,曾經有小說講過天行者入咗魔之後對付帝國。Edmund話如果從電影方面睇,佢會覺得吸引,因為Mark Hamill一向有飾演壞人角色,雖然佢係出名嘅天行者,另一方面佢都係入型入格嘅小丑(聲演)。
Fans當然希望《星戰》長做長有。Danny:「起碼我鍾意玩之餘,到我下一代玩,再下一代都可以一齊玩!」Carmen:「我都希望呢一集嘅結果有延續性,或者有一個小結,化解咗一個危機,留低伏線等我哋期待下一集。」
鳴謝:The Rebel Legion Hong Kong Base
第1集:【65歲全港最老白兵】斬阿爸手出於愛 《星戰》譜父子情:人哋唔信我咁好魄力
http://bit.ly/1PXUpX8
第2集:【七大要素】點至算係《星戰》真狂迷? 首先,你要有......
http://bit.ly/1lQRaUd