有一著名美國非牟利機構致函某人求助，話在本港之分支機構過去20幾年都在渣打銀行有往來戶口，屬普通存款、付款一類嘅支票戶口，因分支亦係不牟利，香港有數名職員，平日賬目清楚，簡單到極，偶然有本地捐錢，用港元支票，就存入戶口啦，收美元支票，可寄回美國總部入數。
點知近月接到渣打示意，叫該機構另尋銀行開戶，該機構為之愕然，於是周圍問吓，間間銀行都耍手擰頭，唔肯接收呢個「客仔」，該機構總部於是致函某人，請佢幫忙。某人其實對銀行業務唔熟，走來問左丁山，左丁山一聽，就知道係關於美國FATCA （Foreign Account Tax Compliance Act）之事，認真麻煩。美國稅局為防止、追蹤美國納稅人在海外儲存資產，跟住逃稅、避稅、洗黑錢，自2008年金融海嘯後，大力查辦國內外銀行有無知情不報，一發現有涉嫌犯規之處，就動輒罰款十億以至數十億美元，匯豐渣打過去幾年已付罰款不少，真係罰到怕。有咗FATCA之後，任何金融機構，如有美國客戶（美國註冊公司、美國護照持有人、美國綠咭持有人）不論身在何方，皆要向美國當局申報，一旦申報錯誤，後果堪虞，故此本港證券商、銀行見到美國人客戶就怕，情願唔做生意，請佢地去搵自己人花旗銀行算嘞，咪煩親阿叔。
以前香港有四間著名美資銀行在街頭街尾有分行，即萬國寶通（現稱花旗），大通（現稱摩根大通），美國銀行及運通銀行，現時美銀與運通已銷聲匿迹，難得一見，摩根大通專營投資銀行業務，只剩番一間花旗銀行在香港有地舖分行，故此某人問到左丁山，就叫佢請該美國非牟利機構接觸花旗，睇吓花旗肯唔肯收留美國機構客仔啦。
一位前美國駐外外交官，幾個月前在華爾街日報撰文哀嘆，海外美國僑民飽受美國政府摧殘，稅率既重，有環球徵稅，現在又有FATCA，搞到美國僑民完全不受外國金融機構歡迎，似過街老鼠，美國政府對美僑好唔公道，亦都因此大大影響美國公司及美國人在海外開拓市場做生意及發展文化外交，長遠對美國經濟不利。不過美僑有美僑呻苦，美國政府一於唔理（因為美僑選票力量唔夠大），繼續嚴厲要求海外美國人及海外銀行填報，如有漏報，分分鐘罰埋銀行申報不周，咁搞法，本港金融機構梗係唔歡迎美國人客戶啦！