基斯坦奴朗拿度（C朗）今季狀態時好時壞，對強隊唔識入波，但對弱隊就係咁刷數據，就好似日前歐聯對馬模入咗四球。英國《太陽報》引述C朗接受西班牙電視台訪問嗰陣話，呢位皇家馬德里前鋒都知自己狀態麻麻，佢解釋最近受個人問題困擾。《太陽報》嗰班做慣八卦新聞嘅編輯即刻聯想到，唔通C朗係因為中途轉「基」搞到冇心機踢波？
操完例飛摩洛哥會密友
C朗同西班牙電視台咁講：「成季嚟睇，我嘅表現喺水準以下，但大家要體諒，我自己有啲私人問題。」男人嘅問題不外乎錢同女人，C朗啲錢多到使唔晒，當然不成問題，咁應該同女人有關。呀！我求大俠要修正，可能係關男人事。早幾日有間法國電視台爆料，話C朗同摩洛哥嘅超重量級拳擊手巴特哈利之間唔單止係巴打咁簡單，仲有hehe關係，報道更加話C朗每次操練完就急急腳趕去機場，飛去摩洛哥搵佢，每星期都去三、四次。之前哈利放過佢同C朗啲合照上社交網站，感覺都幾hehe㗎，哈利仲留言話佢哋啱啱結婚。我求大俠嗰陣仲以為係講笑，但𠵱家咁睇話唔定係真。
當打球星「出櫃」難
𠵱家社會思想開放，越來越多人支持同性戀者，但喺球圈之中同性戀依然係禁忌。雖然唔少球員都企出嚟話撐同志平權，但咁耐以嚟，都冇一個當打球星敢「出櫃」，例如前德國國腳希斯佩加都係掛咗靴先敢企出嚟，可見同性戀喺球圈之中仍然係不能說的秘密。無論係真係假，傳媒話C朗係基，肯定對佢有啲影響。當然，私人問題有好多種，除咗hehe之外，可能C朗係講緊其他嘢，例如佢同囝囝、阿媽等屋企人嘅關係。
另外，C朗仲喺訪問向皇馬表忠心，「我同球會份約仲有兩年，我會留隊。話我轉會嗰啲只係傳聞，呢啲傳聞年年都有，但我只係想講，我喺皇馬好開心。我哋都需要畀啲時間教練賓尼迪斯，佢適應得好快，我同佢嘅關係都好好。」