中環街市二樓有一間開業19年嘅曬相舖，咪睇佢佈置陳舊兼雜亂，聽講特首梁振英夫婦與前高官唐英年都曾經幫襯，喺呢度影過證件相。
喺呢度影一套5張證件相連埋執相，即係執走黑眼圈、細紋等，小童130蚊，大人180蚊。店主譚小姐指，舖位月租約2萬元，唔算特別便宜，佢一路留喺中環街市經營，主要因為儲落一班熟客，「好多客搬咗去元朗都返嚟搵我」。
嘆囍帖街重建後變晒
對於中環街市快要進行復修與活化工程，佢帶點無奈咁話，「以前覺得好可惜，但𠵱家覺得已經冇乜好講」。莫非係擔心活化後租金高昂？佢就話「唔係租金問題，而係入場條件呀」。
佢舉例話，市建局早前進行中環嘉咸街重建計劃，一個喺嗰度經營上海雜貨店廿多年嘅婆婆，市建局話佢唔符合資格繼續經營，譚小姐對此不明所以，帶點憤憤不平咁話：「如果呢個社區唔需要佢，佢唔可能經營幾十年，點會由市建局決定佢唔符合資格呢？」
另一個例子係灣仔「囍帖街」（利東街）重建，譚小姐指，有官員當年話會讓商舖回歸，但係重建後整個社區已經變晒調，唔夠十戶願意重返，租金與位置亦都唔同晒。譚小姐見到呢兩個重建情況，早就心淡兼睇化，感慨話：「政府根本冇心畀我哋留低！」