周三NBA常規賽，拜恩（Kobe Bryant）同加尼特（Kevin Garnett）呢兩位喺聯盟征戰20年嘅老將再度交手。拜恩今場波冇霸住打晒，成個第四節到加時都冇打，結果湖人作客以122:123不敵木狼。
D羅素轟23分加時惜敗
37歲嘅拜恩今場上陣24分鐘，攻入11分；雖然全場球迷都大嗌「畀Kobe落場」，但佢喺第四節同加時都坐咗喺後備席，畀機會班小將搏殺。教練史葛賽後都話，會將拜恩嘅上陣時間限制喺30分鐘內，希望佢可以保持健康，打到去季尾。至於湖人小將都冇令呢位大哥失望，今場攻入23分嘅新秀榜眼D羅素（D'Angelo Russell），喺第四節剩番2.2秒嗰陣入波，將比賽帶入加時階段，佢喺賽後話：「拜恩落場都可以交出好表現，但好難得佢肯畀機會我哋。」
至於39歲嘅「狼王」加尼特嘅上陣時間仲短，只得14分鐘；其實佢一早就轉形做球隊嘅精神領袖，放手畀班隊友表演。被視為KG接班人嘅新秀狀元唐斯（Karl-Anthony Towns）亦不負所託，拎到「雙雙」26分同14個籃板，加埋射入全場最高37分嘅奇雲馬田（Kevin Martin），聯手為木狼鎖定勝局。唐斯對於自己幫球隊贏波表現得好興奮：「好開心可以畀其他人知道，聯盟入面有好多極潛力嘅年輕人。」
