上月底被指請假去日本睇紅葉、唔出席TSA聽證會嘅教育局局長吳克儉，噚日用咗一粒鐘，去日本人俱樂會歡送一班即將訪日嘅香港學生，仲即席分享遊日心得；月讀30本書嘅佢，出版遊日攻略肯定冇得輸。
雖然吳得掂以「私人嘢」為由，拒答八方上月底係咪去過東京？但佢同學生分享時就透露：「我最近去過（東京）嚟，我去咗東京大學，我專登行過去」，更指「東京有兩個公園好靚㗎，呢個時候去都好靚㗎，嗰晚我去呢，個湖邊好靚，夜晚睇星好靚，啲紅葉影咗啲燈好唔同，好值得去。」
「食嘢好正、真係好正」
佢分享遊日心得時，有幾項特別推介叫同學一定要試，包括要搭地鐵、唔好搭的士，因為的士好貴，又話日本街上好多飲嘢機，有成80至100款選擇。博覽群書嘅局長又話，去日本一定會去超市，因為好多新鮮嘢睇；雖然唔識日文，但都會花成粒鐘喺報攤同書店，「上次買咗六本雜誌」，「你會覺得好有趣、好刺激」。
佢講到東京係city of cats時，興奮到高舉右手扮貓，但講得最多都係食，多次強調「食嘢好正㗎、真係好正」，「我有一次去新宿，食咗個放題，好正，任食」，又叫學生要去超級市場、地下城，「真係好多嘢食」，仲自爆每次去日本，都會確保每日嘅早、午、晚餐，餐餐唔同，覺得當地咖喱、豬扒特別好食，「最享受食放題」。
日本學生，吳得掂都話交流埋：「我第一次去（日本），我點樣呢？我去到，我喺車裏面望住啲着制服嘅學生，初時唔係好方便，因為啲語言，但我慢慢講，佢哋就聽得到啲，有時我用動作去表達，用啲body language」，強調google translate幫到唔少手喎。掛住研究東京攻略，難怪冇時間處理TSA問題。
李八方
mailto:[email protected]