YouTube香港2015年度熱門影片排行榜，昨日公佈結果。當政府無所不用其極總動員要通過網絡23條，可是在YouTube公佈的排行榜其中一項統計結果——「五大熱門二次創作影片排行榜」中，卻正正反映了網民對二次創作的熱愛。
「睇住呀！」今年1月2號播出嘅《東張西望》，吳幸美訪問咗緊急應變中心安全主任梁國安，由對方示範在人潮中如有需要時，可發出「有震撼性的聲音」保命，當時梁國安還親自示範，以手勢配以怒吼一聲「睇住呀」，令吳幸美亦給嚇一嚇。
呢條片，版權屬無綫，但二次創作同惡搞一樣精采。本地YouTuber 、100%憤怒鳥、甚至J Fung等紛紛「二次創作」，其中以BOMBA拍攝嘅「震撼聲的應用——睇住呀」錄得逾72萬點擊，登上YouTube2015年度香港熱門二次創作影片排行榜首位。
排名第二(香港)嘅二次創作影片，毫無懸念，係「麥浚龍愛情五部曲 【耿耿於懷】【濛】【瑕疵】【念念不忘】【羅生門】點擊逾63萬人次，純歌曲+相片，簡簡單單，就是我們的感情成長誌。
排名第三係《格雷的五十道陰影》韓國版(韓國SNL) 、第四係「【強勢推出】全新概念大碟《等埋發叔》」，一場建制派弄出來的鬧劇，見盡政客互相委過的醜態。第一主打《幾分walk-out幾分痴》，仲有《假如讓我＿下去》、《虔婆掉眼淚》以及《發叔太遲》等等等等，隨碟奉送孽瘤哭泣聲官方MV，令人忍俊不禁。網絡23條，就係要禁止大家笑佢哋嘅醜態。
呢條片點擊好高，有逾38萬人次，但條片其實係將高登巴絲同梁栢堅等精心傑作之大成。
排第五嘅二次創作影片，其實都係嚟自一個「醜」字——OH honey honey baby，honey honey baby——「香港4人女子跳唱組合FFx SUGAR BABY (天線得得B版MV)」。都係四人組合，都係跳得唔齊，但得得B彈彈下點都好睇過FFx騷手弄姿。點擊率36萬。原片截至今日，有291萬人次。
套用番BOMBA「震撼聲的應用 -- 睇住呀」片末一句：「幻想世界有時比現實世界更瘋狂」。