【男潮籽：玩物達人】
看似突然，球迷其實心裏有數，近年傷病不斷的Kobe Bryant上月正式宣佈於季後退休。征戰20個球季，無數高低起伏是是非非，儘管他的球風性格人品並非完美，然而不少人也說：「即使你不喜歡他，但他絕對值得尊重。」多年來，他留下多少個精采入球、多少對漂亮球鞋、多少件背負輝煌戰績的球衣，全是球迷最好的回憶。
球場上的成長伴侶 至愛Pro-Cut球衣
如果你跟記者一樣是個七、八十後的波友，或有同樣感覺：整個籃球生涯，Kobe彷彿倍伴左右。當你升讀中學、拿起籃球那年，可能就是Kobe進入NBA的一刻；今時今日有心冇力、行多過跑，也是Kobe退休之時。工程師阿朱亦因這個原因而一直追隨Kobe身影，「開始學打波嗰陣，咁啱就係Kobe出道，佢勁，當然係鍾意佢嘅原因，但更鍾意他嘅努力同鬥心。」1998年Kobe來港，阿朱首次近距離接觸NBA球星，更是刻骨銘心，對Kobe的「情根」也加倍深種。追隨偶像多年，趣事不少，當然不得不提Kobe於1998年的爆炸頭造型，還在讀書的阿朱亦有樣學樣，如今想起他也忍俊不禁。問到最難忘的事情，以為會是05-06球季單場獨取81分的歷史時刻，他卻說：「以佢嘅能力拎81分有幾難吖，但係打波係打整體嘅，所以仲係2009年重奪冠軍嗰刻最感動，經歷過最低潮，再對塞爾特人復仇成功，感動到想喊！」
出一對買一對 退休反是解脫
作為忠實fans，阿朱謙稱自己的收藏品不算很多，亦不算十分珍貴：「自問財力有限，不過我敢講我儲嘅全部都係有血有汗，亦從來冇諗過要賣要炒，只係為咗儲啲同偶像有關嘅嘢、有紀念價值嘅嘢。」球鞋，基本是出一對買一對，雖然未有最珍貴的PE版，但特別版倒有不少，當中最愛是入選明星賽的KB8，夠晒經典；Nike時代的Kobe IV亦是心頭好，並誇張地儲了二十多對不同版本及顏色。「球衣方面平貴都有，最喜歡一啲紀念價值較大嘅球衣，例如拎81分嗰季，或是同Jordan打最後一次明星賽嗰件。」球迷大多喜歡購買落場版球衣，雖然較貴但質料較好，阿朱卻更進一步，愛儲Pro-Cut球衣：「Pro-Cut即係Kobe着嘅真實尺碼，XXXL同+4吋長度，雖然完全唔啱身，但感覺更接近Kobe，當然更珍貴更難搵。」偶像終於引退，可有不捨？阿朱卻笑說：「佢退休對我嚟講係解脫！因為唔使再繼續使錢儲佢嘅嘢，哈哈哈！」話雖如此，但相信總有不捨，何況君不見Jordan退休多年，產品還是出個不停，想解脫？太天真了。
愛他竟因市儈 金章8號最珍貴
經營球衣店的王傑，早在Kobe出道前已是湖人fans，Kobe出現自然吸引了他的目光，但是情根最初基於市儈，「嗰時我儲籃球卡，Kobe係較少人留意嗰位，價錢低，但我覺得升值潛力高，所以開始儲，亦都更留意同鍾意佢。」據他說，Kobe的fans一直甚多，以賣出球衣的數字來看，甚至認為Kobe fans比Jordan的層面更闊，「有8號嘅老球迷，有24號嘅小朋友，估唔到女仔都有唔少，Jordan反而係老一輩或者死忠多。」問到Kobe球衣有否升值潛力，他就說：「個人首選96-97球季、有NBA 50周年金章嘅8號球衣，因為得嗰一季有金章，而且對老一輩球迷嚟講Kobe永遠都係8號！」
記者：韓繼聰
攝影：林栢鈞
編輯：陳國棟
美術：孔文彬