今屆區選，世代交替成為不可逆轉的潮流。新一代政治人物中，學民思潮召集人黃之鋒一向站在鎂光燈下，但在區選中，挾着港姐男友、西環契仔、清洪徒弟之名出選的林作，亦開始廣為人熟識。一個主張抗爭，而一個主張「第三條路」，當他們碰頭時，究竟會擦出甚麼火花？
林：林作 黃：黃之鋒 主持：李慧玲、黎千銘
對方第一印象
林：我寫咗個「直」字，我睇咗佢Oxford Union嘅演講，好明佢講乜嘢，相反好多成年人長篇大論都唔知講乜。
黃：個頭幾亂吓，同埋顛覆我對從政大律師嘅印象，過往余若薇等人非常之嚴肅，但林作風格輕鬆，甚至乎佢自稱「輕佻」。
何謂「第三條路」？
林作在區選提倡「第三條路」，這跟傳統的建制、泛民又有甚麼分別？
黃：你嘅原則（第三條路）係？
林：我嘅原則係爭取民主。
主持：具體即係乜？
林：要達致民主，但用一個溫和嘅方式去爭取。我唔係話好樂觀呢條路一定行到落去，但激進嘅方法而成功嘅機會幾乎係零。
主持：有冇一個實質舉動，如你係立法會議員，會喺立會做乜？
林：最緊要有個原則，就係泛民代表可以出現喺（特首選舉）投票紙嗰度。但我唔認為公民提名係需要，提委會足夠民主化已可以。
黃：泛民都唔係講公民提名係必須，你嘅立場即係民主黨嘅立場。
林：確實有同民主黨重疊嘅地方。
黃：你入民主黨咪得，佢哋講緊嘅就係溝通、對話、減少矛盾，唔使公民提名，增提委會就得。
林：我會話佢哋咁多年嚟已經有好多嘅負擔，作為一個新人就係唔想有呢啲負擔。
六四立場分辨人定鬼
主持：之鋒話會用六四分辨人定鬼，如林作係立會議員，你會點投平反六四議案？
林：唔需要咁快歸邊做建制定泛民。呢個係冇約束力議案，唔知投嚟做乜。政治現實係你投咗要求道歉（平反），咁至少喺目前就喪失咗同中央溝通。
主持：即係你為保留溝通機會就唔支持？
林：我會話私底下表達意見係可以，（投票）我認為係冇意義。
主持：湯家驊好似次次都投支持平反六四。
林：湯生所以就有個包袱，點樣同中央建立互信。
主持：咁你立場係乜？
林：立場同投票唔係好同。投票係就議案表達意見，有佢嘅影響；但你態度係可以表達嘅。
黃：已經講咗三分鐘，你投咩？
林：我覺得中央政府應該有個交代。（咁你投支持、反對定棄權？）呢啲咁hypothetical（假設性）嘅問題，你畀唔到環境因素畀我，好難答。
假如之鋒是立法會議員……
之鋒若司法覆核成功便會參選，就近日爭議的網絡廿三條議題，假如他是立法會議員，會有甚麼不一樣的抗爭？
主持：點解選你而唔係劉慧卿？
黃：我同劉慧卿喺網絡廿三條認知上有啲差距。
主持：咁你同慢必呢？
黃：會唔會同慢必佢哋做嘅嘢一樣都係拉布，我直接答入到議會都係拉布，同有更多不合作運動。
之鋒營多贈林作
主持：聖誕就到，提早交換禮物，廿蚊為限……
林：我買咗罐啤酒，希望錄完音可以傾吓計，多啲溝通。
黃：我送一包營多撈麵，林作早喺中學過咗外國貴族學校讀書，未必了解香港學生食乜。
林：我噚晚先食咗兩包，我懷疑我工人買。
黃：哦，工人。
【壹錘專區】
星期一至五黃昏
6時直播
《壹錘定音》收睇/收聽方法
1:手機App
《蘋果動新聞》手機App右上角有【壹錘定音】icon，一按即聽；按左上角icon，彈出【壹錘定音】選項，一按即睇。
2:網頁
http://www.hammerout.hk/
直播PHONE IN：2992 3333
WhatsApp 留言/報料：9132 3813