禮拜日國際賽日一如以往用全闊A欄，內欄養草超過個半月，究竟場地利放定利追呢？睇番上季12月14日國際賽日A欄賽事，除了短途之「友瑩格」及「活力寶」擺前放到外，其餘場次差不多由居中後上馬包辦頭馬，如「直震撼」、「威爾頓」、「大印銀紙」及「共創美夢」都係在早段居於尾叠位置，入直路憑後勁反先對手，故此靠後勁食糊嘅馬可優先留意。
今戰列陣馬中，第二場「鈦金剛」正是於最近一次田A欄賽事贏馬，亦係全場唯一贏過此移欄之參戰馬，憑較佳場地性能可秤先。另外，第六場「聰敏不凡」兩次跑田草A欄賽事均贏馬而回，後追馬跑闊場明顯特別啱發揮，用黃皓楠減磅有權偷襲。