岑麗香今年10月被本報踢爆與喺加拿大任職金融業嘅6呎大隻男Joshua發展異地戀，噚日有報道指男友Joshua視像求婚成功，香香明年披嫁衣。
Video求婚太Hea
香香同高海寧（高Ling）噚日以溜冰仙子造型，去海洋公園出席聖誕活動，記者連番恭喜香香，佢尷尬咁話：「我有send新聞畀佢（Joshua）睇，但唔係真，我都唔知邊度聽返嚟。」問男友係咪已求婚？佢話：「未，大家都冇得見，唔通真係咁求其video求婚咩，雖然今時今日好先進，但我好old school㗎，一步一步嚟。」
香香直言異地戀係障礙，家陣未有結婚打算：「大家都想將來喺同一個國家，多謝大家祝福。」又話希望男友能來港工作：「畀少少時間佢，要一步一步。」有傳香香高調公開戀情，被公司照肺，調離女一之位，香香否認：「冇，雖然拍拖時未正式公開，但有同公司update，公司冇畀壓力亦冇反對。」
撰文：馮仁昭
