走入容伯伯嘅開心公司，感到既熟悉又陌生，因為不時聽到噹噹聲，咪就係兒時家中嘅機械鐘，每逢整點發出嘅噹噹聲，𠵱家年輕一輩都好少用呢款噹噹鐘。
容伯伯都話，呢類鐘嘅客路較窄，多數係喜歡懷舊嘅本地人或者外國人，「有時三、兩日都冇客，有時一日賣幾個，好難講」。不過佢好自豪咁話，全港可能只得佢識得修理呢類機械鐘，有得賣嘅地方亦唔多。
容伯伯間舖頭開業22年，佢話，早於6、7年前收到活化計劃嘅通知，當時佢都試過另覓舖位，不過之後市建局又「一直冇咗件事」，佢就一直做到𠵱家。「嗰陣我哋都贊成活化，但講嚟講去得個講字」，「幾個計劃都唔成功，當初話要做城中綠洲，之後話冇錢又唔做」，容伯伯對成事件嘅發展似乎瞭如指掌。佢𠵱家最希望活化後，「一定要留番個位畀我哋，做咗咁多年，客人要嚟呢度搵番我哋」。