周日（13日）除咗國際賽之外，今屆打吡嘅前期熱身戰，其實亦靜悄悄揭幕，睇番上季國際賽日，「直震撼」贏出一場二班千八米，冇耐成為打吡亞軍。而今年國際賽，亦有唔少適齡馬匹，稍後會以一系列四歲馬大賽為目標，就算現階段唔谷盡，但幕後始終要測試佢哋嘅實力，所以仍會力求表現打真軍。
大家最熟悉嘅，當然係第九場一班千四米嘅太陽神「首飾太陽」，上次屈居亞軍，只因季內初出狀態差少少，先至畀「飛來猛」有機可乘，拼後試大閘走勢從容大把喺手，戰鬥力明顯提升，呢匹馬連同外國共八戰，攞到五冠兩亞一殿，演出咁可靠，的確可睇高一線。
至於第六場二班1600米，在港初出嘅「明月千里」超強戰績，絕對唔嘢小，來港前最後六仗均跑級際賽，得三冠三亞，反映正在不斷進步中。贏過2200米二級賽鷹園盃，亦係2200米一級賽昆士蘭打吡亞軍，級數有晒保證。大家要留意，大摩今季有多匹評80分以上嘅打吡適齡馬抵港，「明月千里」係最早登場一匹，可見適應佳進度好，事實上近日試閘走勢純熟，輕身有勁，真係隨時一戰功成響朵。