今屆世冠盃噚日喺日本開鑼，東道主廣島三箭喺資格賽以2:0輕取奧克蘭，晉級半準決賽，會同馬贊比爭入四強。
呢場資格賽喺橫濱舉行，由日聯季後賽冠軍廣島三箭對世冠盃常客、大洋洲盟主奧克蘭。三箭上星期六先踢完日聯季後賽總決賽，所以呢場先收起米傑治同戴恩費斯杜格拉斯兩位外援，但都夠實力搞掂奧克蘭。三箭先靠皆川佑介喺九分鐘開紀錄，到70分鐘，後備入替嘅杜格拉斯助攻，由後防鹽谷司埋齋，贏2:0晉級，佢哋下周日會喺半準決賽對非洲嘅冠軍馬贊比。下周日仲有另一場半準決賽，由亞洲嘅廣州恒大對中北美嘅CF阿美利加。
至於直入四強嘅巴塞就有尼馬受傷，佢喺周二操練時拉傷大腿，佢老竇兼經理人話尼馬至少要唞一星期，踢唔到四強，但如果巴塞晉級，佢應該可以踢決賽。巴塞今個月17號會喺四強對廣州恒大同CF阿美利加嘅勝方，決賽就會喺20號踢。
