工黨會喺星期日（13日）舉行會員大會改選領導層，現任主席李卓人（圖）放棄連任，佢話係時候交棒畀班後生，笑指𠵱家個個黨都話要傳承，若然佢繼續做主席，班細嘅好難有機會累積經驗，所以係時候退下火線，但佢同工黨另外兩位立法會議員何秀蘭、張超雄都會續任執委。
準備競逐主席嘅包括該黨第一位區議員郭永健，人稱「細孖」嘅佢雖然喺上月嘅區選連任失敗，但勝在夠後生，同時係秘書長，對外對內都好有經驗。第二位係副主席鄭司律，佢同細孖一樣好後生，又有領導層經驗，實力不容忽視。最後係做過執委嘅胡穗珊，佢喺職工盟浸過好多年，早輪又喺英國進修完，見得大場面。李卓人話呀，無論最終邊個接棒，佢都好放心，因為三位年輕人個個都好肯承擔。