香港今時今日發生嘅事，要幾荒謬得咁荒謬。港鐵畀高息港府，以為就填到高鐵大白象個氹，但以債還息，未來一定加票價，受害都係香港人；呢條高鐵造價突破800億，政府之前估計帶來嘅經濟收益，最樂觀都係未來50年有800億，即係做咗蝕本貨，最好笑係局長用「賠了夫人又折兵」嚟形容，仲話唔起都唔得。
講真，起高鐵點會係港府單一地區嘅意志，好似國家主席習近平一聲「中國夢」，要將中國足球打造成世界強隊，廣州恒大率先慶賀，上月再奪亞冠盃，嚟緊再挑戰世冠盃，仲有財團入股馬德里體育會同曼城，總之要話畀全世界聽：「如果沒有中央政府照顧，西甲、英超早就完蛋！」
風光背後，恒大又係咪大白象？恒大上月喺國內甚麼新三板上市，吹噓到亞洲首間上市球會，但上得市就要公開賬目，結果真係嘩一聲，唔係盈利而係虧損：2013、14年分別蝕5.76億同4.83億人仔，2015年一至五月已經蝕2.65億；拎到亞冠盃唔代表收入多，反而要派更高獎金，今年虧損應該更多。凡係中國公司都要有啲共產黨式口號，恒大上市就公佈甚麼發展報告、三大計劃，目標躋身世界20大球會，2016年起有盈利；足球學校培養出中國足球人才，要六年內全華班云云。講就好聽，但做就……
好彩我哋偉大特首似乎唔太識足球，至少身在菲律賓都唔識搵link，相信佢唔會浪費納稅人嘅錢去中國投資足球，否則多多都唔夠蝕。
文：牽牛