泛民議員噚日為阻俗稱「網絡23條」嘅版權修訂條例二讀，唔少表明會拉布嘅議員，一早發功先後要求點算人數，包括新民主同盟范國威、社民連長毛同埋人民力量「慢必」陳志全。其中慢必要求點算人數時，撞正經民聯議員林健鋒起身準備發言，唔知係咪不滿發言被打斷，向來斯文嘅林健鋒即場「黑面」，一坐番低、未熄咪就講出心底話，爆出「冚家……」
自嘲性情中人
到底「冚家」之後係乜呢？八方希望進一步了解林健鋒嘅真心發言內容，情深說話未曾講嘅一粒字係乜，但佢晚上出席活動時只拋出八字真言︰「人無完人，性情中人」。網民對佢嘅「發言」當然有前所未有嘅興趣，尤其係未熄咪疑似爆粗嘅一句，下半截到底同生果有冇關？雕花拆蟹味甚濃喎！
八方幫大家溫故知新，其實立法會議員講「冚家……鏟」，唔係新鮮事，獨立議員黃毓民同社民連長毛，今年6月喺立法會保安事務委員會討論「有犯罪或不誠實意圖而取用電腦」適用範圍時，毓民就曾舉例指「冚家鏟」同「滅門」只係雅俗之分，但前者卻要捱告。長毛當日曾笑指，「冚家都係共產黨」嘅簡稱咪就係「冚家產」，仲話「係榮耀嚟㗎大佬！」其間即場受到委員會主席、民建聯葉國謙喝止。
李八方
mailto:[email protected]