「風之后」李麗珊多年前拍廣告，話養大一個小朋友要400萬元，搞到人人生仔前都望一望戶口先。大新銀行（2356）同市場研究公司Nuance Tree最新調查顯示，培養子女「入門版」成才，平均需280萬，想「升級版」供佢去海外留學，就盛惠700萬！
調查訪問500名流動資產有50萬元以上嘅家長，理論上佢哋應該比較有經濟能力，但當中73%都要呻，未儲夠錢栽培仔女成才。咁點樣先叫做「成才」呢？有七成人覺得「成才」跟高收入工作、充裕經濟能力有關。同時有過半家長計劃仔女大學畢業後，仲會財政資助佢哋，八成人話會資助埋物業開支㖭！「成功需父幹」真係一個打不破嘅魔咒。