早前香港旅發局主辦嘅首屆香港單車節，吸引唔少踩車友落場破風，包括新鴻基地產郭炳江嘅公子郭基煇Adam以及一眾高層。新地呢鋪出力又出錢，皆因佢哋係單車節贊助商，參賽者每捐一蚊，佢哋就捐多三蚊，最終籌到逾300萬，實行寓運動於慈善。
Adam噚日代表新地向受惠機構包括公益金同小童群益會捐贈善款（圖）；Adam笑笑口話明年都會參加，仲提出賽道可以長啲、交通改道安排可提前話畀市民知。而喺備戰明年單車節前，Adam下月又會參加另一場慈善單車繞圈賽；雖則只係喺龍和道繞圈，佢話都要操練㗎，強調繞圈賽好着重爆破力，繼續挑戰個人極限。