當中國喺世盃外瀕臨出局邊緣，好多國內球迷都將希望放喺廣州恒大度，想恒大可以畀到啲安慰佢哋；最後恒大贏咗亞冠盃，嚟緊仲出戰世冠盃。不過，用金錢堆砌嘅恒大王朝背後，中國足球出現一個青黃不接嘅困境。
每個聯賽嘅頒獎禮，除咗會有最佳球員呢個大獎，都肯定會有最佳年輕球員，頒畀啲有潛質嘅新秀，但喺今年嘅中超頒獎禮，呢個獎竟然冇得獎者，因為中超小將太少！過去一季，中超唔夠30個22歲以下球員上陣過，仲要差唔多全部年輕球員都係冷板兵，連主力都踢唔上。中超呢次都算破例，空咗個獎，間接控訴啲球會唔用新人。
作為中超班霸，恒大唔鍾意用小將，喺正選陣容入面，最後生嗰位中國球員已經係26歲嘅張琳芃；咁22歲以下球員嘅出場情況點呢？係得20歲中場王軍輝有超過10次聯賽上陣，但大部份都係後備入替。
今次參加世冠盃，恒大搵埋養傷大半年嘅阿倫杜格拉斯入選，雖然阿倫實力係高過班國內球員，但佢自從二月踢過比賽後，就一直冇踢過正式比賽。恒大寧願用一位近乎零狀態嘅外援，都唔願意畀機會啲年輕球員見吓大場面。唔好話啲20出頭嘅小將，連好多上緊位嘅第二梯隊都冇份踢世冠盃，例如張佳祺同董學升。
10年前，中國足球靠鄭智，10年後仲係鄭智。隊隊波都依賴老將同外援，唔肯冒風險去培養新人，國足成績退步都係自然嘅事。
文：咖喱