張晉從武術運動員、武指再成功轉型做演員，捱了十年升格金像獎最佳男配角，終於成功打出一條好戲路。過去的辛酸，成為他成長的重要經歷，每一部戲出盡全力去打是他座右銘。在即將上映的《葉問3》，張晉繼續一貫的出盡力作風，單挑宇宙最強甄子丹 ，「打得最耐係同葉問嘅決鬥，我覺得會好精采，留待畀觀眾評論，我哋盡晒力㗎喇！」
統籌：林妙萍
造型、撰文：陳蔚渝
攝影：郭賢興
化妝：Emma Lee
髮型：Franco Chung @ Hair Corner
本來已經擁有一身好武功的張晉，今次為拍《葉問3》事前做足準備工夫，專程正式學詠春，原因是想深入了解，然後去設計角色上的詠春動作，令自己體會更深，不單單只為打得好睇，也為文戲演得更傳神。
勝不驕敗不餒
在戲內飾演張天志，其中一場被逼到去絕境的戲，令張晉感受特別深，想起自己當年在北京跑劇組的低谷期，「好似逼到去一個絕境，點解都冇人肯用我嘅時候，其實同張天志好似，所以我特別鍾意嗰場戲，生活當中有所體會。」他認為人是需要不停去找自己，從而令自己成長，「每個人嘅經歷都唔同，我唔係一入行就遇到好機會，一步一步係好事，對我心態上都有幫助，無論係好嘅說話，聽到唔會驕傲，難聽嘅說話，都唔會令我自卑。剛入行我是較心急同傲氣，但慢慢被現實打倒，覺得理想與現實有好多差距，同埋經歷咗你嘅傲氣係冇用嘅時候，咁就要腳踏實地去行。」
拍戲不為攞獎
曾經奪得金像獎最佳男配角 ，問到張晉會否想再攞獎，他說：「攞獎係一件非常開心嘅事，但我唔想被呢件事牽住，如果有獎都係bonus，因為演員同運動員好唔同，運動員嘅終極目標係攞獎、攞冠軍，但演員嘅終極目標唔係呢樣嘢，嗰個係一種鼓勵，當然都恨啦，但我哋拍嘅時候唔係為攞獎，係拍畀觀眾睇。」
他認為一套電影，最重要是觀眾覺得值回票價，「如果睇完個個都鬧，咁就要下次再努力過，但如果睇完覺得值，甚至過咗一段時間或者幾年之後，大家都會諗得起呢套戲，一啲動作場面、又或者文戲，我就已經好滿足，觀眾難忘，我就覺得值得。」
無目的也幸福
身為一個武打演員，除了做運動練功絕對不能偷懶，張晉更因為上一部戲要演繹吸毒及患癌者，而要刻意狂減肥，「做到呢行又有精采之處，我係呢個角色都深有體會，拍完之後覺得自己都幾幸福，每一次體驗唔同角色，都特別珍惜現實當中嘅生活。演員係應該要付出，如果唔係點解人哋要為你鼓掌，可能一部戲出咗，得到最多就係演員。」
現實生活中，張晉自言是一個安靜的人，「我啲小朋友瞓咗，就會開始慢慢諗吓自己嘢，又或者同身邊嗰個傾偈，我同太太商量每星期都攞一日出嚟，同朋友或者身邊嗰個相處，唔係唔理班小朋友，而係要有自己生活，其實係冇目的嘅，但唔做一啲無聊嘅嘢，係唔會做到有意義嘅嘢，生活係多元化多姿多采，如果每一樣嘢都要有目的，會好辛苦好攰。」
是慈父也是嚴父
與蔡少芬生了兩個囡囡的張晉，笑言既是慈父也是嚴父，「媽媽也是，唔可以只扮演一個角色，佢鬧嘅時候我唔好出聲，我鬧嘅時候佢都唔好出聲，錫嘅時候就兩個一齊錫，不過最近我哋商量鬧少啲，盡量畀囡囡感覺爸爸媽媽好愛佢哋，唔好大個咗只係諗起好惡嘅樣，要錫多啲，忍耐多啲。」囡囡會否因為爸爸呷醋？「大女比較識表達，所以會黐我多啲，細女就唔係好識衡量爸爸媽媽，佢鍾意黐媽媽嘅話就會唔理我感受，一手推開我，但媽媽唔喺度我就No.1。」
更多精采時尚內容，盡在 http://add.appledaily.com 。