為配合旅遊發展局「香港繽紛冬日節」，新一輪「閃躍維港」3D光雕匯演噚晚起再次喺尖沙嘴上演，今次以聖誕童話故事為主題。尖沙嘴文化中心及前九廣鐵路鐘樓外牆會幻化成冬日故事書，透過立體影像、燈光同特別音效，大講夢幻聖誕故事（圖）。
匯演全長8分鐘，講述小女孩向聖誕老人寄信許願，願望係過一個奇妙聖誕，仲想收到一隻粉紅熊貓布偶作為禮物。於是聖誕老人派出小精靈去香港，為各區建築物安裝五光十色聖誕燈飾，又將聖誕樹送去商場作為點綴，最後不忘為小女孩送上禮物，達成佢願望。光雕匯演即日至12月28日每晚8時20分至9時45分，分節舉行。詳情可參閱旅發局網頁。