今屆區選公民黨喺多個中產區收穫甚豐，喺麗晶花園當選嘅畢東尼Anthony度到條新橋收集民意，就係喺麗晶嘅大快活一邊食早餐，一邊豎個牌出嚟，寫住「東尼與你，咖啡短聚，收集意見」（圖），邀請居民同佢邊食邊傾，連黨魁梁家傑都大讚「咁都畀你諗到！」
Anthony話由於未正式上任，未有辦公室，平日都係開街站收集意見，但噚日落雨，街站開唔成，決定用呢個新方法，結果由早上9點坐到11點，唔少居民買嘢食時都向佢報以微笑打招呼，有街坊甚至上前同佢表達區內問題，一傾就半粒鐘。其實大快活職員有叫佢同公司申請，但Anthony話下次可能轉戰區內另一餐廳咯。