現年50歲嘅郭富城最近同內地𡃁模方媛（Moka）兩度喺微博「放閃」晒愛，惹來網上負評如潮，連城城舊愛熊黛林（Lynn）同茍芸慧都好葡萄，先後喺網晒出同男友着情侶鞋同熊公仔糖拖手相。
噚日有雜誌指城城同Lynn甩拖後，秘密同歌手方皓玟拍過拖，佢哋曾經喺Ig隔空傳情，有指城城戀上Moka後即同方皓玟分手，搞到方皓玟大受打擊要憑歌寄意，寫了《分手總約在雨天》抒懷。方皓玟避談與城城關係，只話：「唔好問啦！」方皓玟噚日未有接聽電話，只係喺微博留言：「得啖笑。」
另外，傳與Moka拍過拖嘅潘瑋柏噚日喺台灣出席活動，佢承認識Moka，但否認曾相戀。
《踏》片短版搞笑
城城主演嘅《踏血尋梅》截至前日上映6日累積票房有213萬，以一部3級片嚟講成績算唔錯。張叔平仲剪咗個100分鐘短版，當中好多消失的鏡頭幾好笑，有場城城同譚耀文喺廁所講白只殺死春夏嘅動機，兩人如廁聲好響亮，證明身體好健康。
另一場城城同阿譚喺茶餐廳同班90後學生討論李修賢定周潤發邊個靚仔啲？但班學生唔知邊個李修賢。
撰文：馮仁昭
