習近平風塵僕僕，往巴黎參加世界氣候變化峯會，與奧巴馬會面，發表了一些「阿媽是女人」的環保語言之後，就飛去非洲訪問，大灑金錢送禮，連非洲最著名嘅貪腐大鱷，獨裁者穆加比總統（津巴布韋）都拉攏埋，內地貪腐高官將領不知對此有何感想。
事有湊巧，習大大不在京城之時，北京連日霧霾蔽天，空氣極度污染，沙士權威鍾南山公開講，北京市民四年來患肺癌發病率增長四倍，同是吸煙煙民，農村煙民患肺癌機率比北京煙民低兩倍。雖無科學實證，卻可以推斷北京空氣污染係人民健康殺手。
中國北京、印度新德里，同是交通非常擠塞，空氣極度污染嘅首都。汽車噴廢煙，人民燒煤，發電廠燒煤，當然係增加排放及污染空氣嘅源頭，既然大家知道，點解中印兩大國都似束手無策？
最簡單解釋，就係錢作怪，煤係最便宜，最易買到嘅燃料，人民窮，就唔會聽高調去用貴價太陽能，況且冬天時份，人民最要取暖時，北京何來太陽？搞核電，印度冇錢，中國有錢，又限於種種原因，未必可以全面建設核電廠。比較容易方法係用石油、天然氣發電，中國到咗2035年，會輸入25%用油量，印度就會輸入90%用油量，好彩油價在未來十幾二十年，因為有美國頁岩氣頂爛市，價錢易跌難升，否則印度好難負擔得起。
石油價自2014年6月升到高𥧌後，一路下跌到現時每桶40美元左右，唔見咗100美元，伊朗與聯合國達成核能協議後，美國向伊朗解禁，最快明年一月中，伊朗石油可以出口，伊朗有石油藏量600億桶起碼，可日產430萬桶，僅次於沙特阿拉伯，正因如此，沙特阿拉伯睇到實，石油政策最大嘅考慮就係壓低油價，等伊朗冇法子發大財來擴充軍備威脅沙特。故此沙特唔肯減產，伊朗要錢，拚命增產，結果就係油價會好便宜。
扣除通脹後，現在油價比1970至2014年嘅平均價低17%，故此煤炭價極度受壓。從環保角度講，低油價、低煤價簡直係惡夢，令到所有風能、太陽能電力價都貴到人民不願承擔，再生能源發展若無納稅人津貼，幾陷於停頓。巴黎氣候𥧌會只係一場大口水騷，空談難敵貼地經濟考慮，除非各國政府向石化能源開徵重稅，人為提高油價煤價，邊一個政府夠膽呀！