阮經天（小天）同許瑋甯嘅8年情喺今年3月玩完，上月有傳小天劈腿，搭上內地人妻白百何，令許瑋甯死心斬纜，8個月前結束同小天嘅同居生活，更盛傳許瑋甯目前有新歡，男方就係小天好友26歲嘅王柏傑，有傳佢哋係合作拍電影《失控謊言》戲假情真，講係咁講!
不過今日有台灣報道稱，一向「把口啷過油」嘅小天近日似乎o氹掂對方，許瑋甯疑再度心軟，有知情者更向周刊稱佢哋有互發語音訊息聊天，成程有說有笑，稱佢哋講家常話題，似乎戀情死灰復燃!
友人聲稱許瑋甯遲早會搬回愛巢，只係時間嘅問題，目前更眼見對方演藝工作極差，許瑋甯亦唔會狠心放低小天。其實，許瑋甯同小天分開，一直都冇講到好決絕，只係講「分開一段時間」及大家要冷靜下，早前許瑋甯曾被影到同小天同返愛巢，但許瑋甯不承認感情回溫，未知係唔係因為之前男方負面新聞太多，想戀情低調啲呢!?
不過，今日台灣《蘋果》向許瑋甯求證，許瑋甯直言聽完消息後感到訝異，她斬釘截鐵地講：「沒有。」否認同小天復合，表示自己目前係單身，據知二人現時只係朋友關係，小天仍想追回女友，反而許瑋甯仍在觀望中。