盡訴心中情基金會噚晚主辦「華彩耀聯合慈善晚宴」，為基督教聯合醫院擴建項目籌募經費。一聽「盡訴心中情」，就知係白姐姐有份搞嘅活動，佢老公謝偉俊Paul就係晚宴召集人。阿Paul笑言，原本冇咁早到，但「天有不測之風雲」，立法會流咗會喎，佢致辭時仲叫主禮嘅政務司司長林鄭月娥唔好怪議員不力。
林鄭致辭即場回應：「佢（謝偉俊）頭先問我會唔會怪啲議員，我都唔會喇，因為𠵱家立法會流會同拉布都變咗係常態。」點解呢句聽落，好似有骨咁嘅？主禮嘉賓原本仲有食物及衞生局局長高永文，但佢仲休養緊嚟唔到。
阿Paul話晚宴籌款目標係100萬，但晚宴筵開近40席，賣枱已籌近120萬，而拍賣環節中，就包括藝人張可頤捐出一支1988年嘅Petrus，價值6萬8，13萬成交，相信善款已經達標。