頭髮造型品牌Gatsby一直以來做廣告夠出位，我諗大家都會好認同。在香港，佢大部份廣告都係直用（Straight Adaptation）日本原裝廣告，鮮有本地作品。從日本的木村拓哉、松田翔太到最近毛記起用林海峰賣Gatsby，真係有啲計。何解？四樣嘢：低成本、切合國情（廣告用一單低能騙案作為故事骨幹）、唱歌仔易入腦、同一公式（宅男眨吓眼都可以變型男……諗吓都開心啦）。毛記廣告，越收越多本地客，自己做埋創意同製作一站式，落到地、有共鳴、高效益。毛記電視，應記一功。其他電視台，擔心唔夠廣告，面臨執笠，係咪應該學吓毛記，點樣可以殺出條血路？並唔係一定要搞笑、食字食時事、搞諷刺先成功，但原地踏步就死路一條。
更值得一提的，係毛記下年年頭搞嘅首屆「十大勁曲金曲分獎典禮」講到明就係分獎、造馬，總好過人家明係分豬肉但又扮公平、扮專業。毛記才剛做宣傳，我身邊就有大量朋友問我攞唔攞到飛（仲要係打算用錢買嗰隻）。
這個勁曲金曲，由當初的超玩味性質，搞到搬上專業表演舞台，有邊個估計得到？做每一件事，做得專業，成功的機會也自然高。講番之前搗破嗰單世紀電話騙案，你睇佢個運作模式、從招聘、培訓、獎罰制度等是何其專業？話說回來，如此專業老千，害人不淺，當然十惡不赦啦。
講到造馬分豬肉，廣告行內的情況也變得越來越少了。前晚出席廣告業界其中一個重要嘅頒獎禮，其認受性之所以高，就係出晒名評審專業嚴謹、唔分豬肉。能夠同一大班新知故友相聚，份外高興。然而，眼見有幾間活躍多時的大4As公司今年竟然完全絕迹，我心諗：「一係今年生意真係差成咁？一係就因為去年食白果所以嬲咗今年唔玩。」行頭變得越來越細、也越難做……𠵱家做廣告的，好似很多人都忘記了當初入行的本義，廣告要做得專業、玩也要玩得專業、分獎要專業、連造馬也要專業呢！
文廸晞
mailto:[email protected]