做超人李嘉誠嘅紅顏知己，真係唔容易，見到周凱旋（Solina）除咗經常為維港投資四圍去，物色有乜好投資外，就連超人嘅「第三個仔」李嘉誠基金會嘅事，佢都相當上心。
最近佢就為李嘉誠基金會去咗梵蒂岡，皆因李嘉誠基金會聯同Okeanos海洋基金會、世界銀行氣候合作小組、美國Obscura數碼公司，喺梵蒂岡聖伯多祿大教堂搞咗個藝術投影光影活動。
Solina喺WeChat話，今次去梵蒂岡順道參觀梵蒂岡紀錄庫，睇到好多傳教士當年去中國傳教嘅紀錄，獲益良多，仲話有機會一定再去。
仔細睇，Solina喺WeChat係用「夢想者的隨從桑丘」形容自己，Solina曾形容超人好似唐吉訶德咁有俠義心腸，佢能做好隨從桑丘已經唔錯，唔知超人like唔like呢？