特首梁振英新一份施政報告出爐前夕，例牌唔少風聲放出嚟試吓水溫，今年有啲特別嘅係，有關係咪取消強積金對沖一事，早至報告出爐前兩三個月已經流出，工商界亦有別於過往畀勞工界㩒住砌，呢次嘅反擊嚟得較早亦較強烈，君不見幾大中小企商會早前已經攜手召開記者會，高調表明反對立場。
其實當日記者會上，啲商會講到明，連諮詢都唔畀喎，有政界中人私下都質疑，係咪要咁絕先？其實梁振英今次真係「高明」嘞，竟然識得將個波，卸咗去由林鄭話事嘅扶貧委員會身上，話一併就全民退保諮詢，CY此舉無非想令人覺得，佢其實已經做咗嘢，算係兌現選舉承諾，推唔推到唔係佢控制範圍，勞工界唔好向佢追數。
689選票都不保
而另一邊廂嘅工商界，懶理呢個政治炸彈由邊位去拆，堅持連諮詢都唔可以，皆因覺得唔少嘅諮詢都係有預設立場，社會上打工仔較多，又點會唔支持取消對沖？有位工商界越講越勞氣，話呢次一定唔讓步㗎嘞，嬲嬲豬反駁：「咁點解政府又唔諮詢吓，係咪應該輸入外勞吖？」佢強調工商界唔可以再「鵪鶉」，否則俾人蝦到上心口就大鑊鳥。
有政府中人話，呢次工商界識玩咗，預先大鑼大鼓叫反對，加上CY要爭取連任吖嘛，如果連工商界支持都冇埋，689票都不保㗎，難怪要卸個波去林鄭度咯。
花生友
周二、四刊出