周嘉儀離開主播工作半年，前日重操故業到沙田拍攝商場聖誕推廣短片，飾演主播夜遊聖誕燈飾，又跟白宮的玻璃工藝師James Hayes學習吹製聖誕玻璃吊飾。現正職證券公司、兼職幕前的嘉儀表示，近半年有很多新嘗試，她將每日的動向放到facebook上：「例如報天氣、出席活動，同一啲生活照，fans最鍾意我selfie，統計上係最多like，佢哋鍾意見到我個樣多啲。」
拒絕冇禮貌
談到黃家強被特首梁振英selfie，搞到網上平台大洗版，嘉儀以自己經歷說：「啱啱搭車有個男仔都問我可唔可以selfie，一般都會OK，唔會拒絕。同人哋影張相，人哋點用唔到你控制，純粹禮貌，出席唔同場合都會有人話影相，自己覺得拒絕好似好冇禮貌。」回想曾經遇過半推半就的情況，她說：「喺一個朋友嘅晚宴，有位男士飲得幾醉話要影相，當時自己唔係咁想，但對方好熱情，勉為其難影咗張，嗰次都驚驚哋，我又唔知點推。」
聖誕將至，嘉儀指以前當主播時，公眾假期要返工，今年轉行可以享盡假期：「都好期待，約咗同屋企人、朋友開party。」至於感情事，她說：「𠵱家冇拍拖，想喺聖誕前應該冇可能，睇吓新年有冇機會，盡力啦。每次聖誕都係甩咗拖冇拖拍，如果有個膊頭挨吓都係好。」此外，陳智燊和宋熙年昨日亦在同一商場吹製玻璃吊飾。
採訪、攝影：張俊銘