亞視前藝員鄭伊娜最近一個月在微博寫了很多令人感到奇怪的字句，上月26日她留言道：「一個人出走香港，因為近來唔開心，決定出國去散散心。醫生話我唔可以去熱嘅地方……昨晚只睡了一小時，今晚我可以好好地睡一個好覺嗎？」日前鄭伊娜坐的士到佐敦，她下車後走往幾步之隔的大廈，急急撐傘、頭戴鴨嘴帽及口罩的她，不施脂粉容顏憔悴又雙眼無神，鬼鬼祟祟走入大廈後，到一家心理醫生看門診，約一個小時後離開。
鄭伊娜接受本報電話訪問時說：「今日係要去睇醫生，我情緒唔係幾好，喊得好犀利又失眠，咁我朋友叫我睇心理醫生，唔知係咪有抑鬱，總之就心情好差，見到人哋笑，我係好想喊。」點解要睇心理醫生呢？她說：「發生美容事故係一個意外，我嘅情緒有啲唔係幾好，都一段時間，因為呢個美容意外，我嘅工作都要停晒，呢段時間又唔可以見陽光，好多嘢全部都做唔到，所以情緒好差。」
聞毀容想喊
問到美容事故，鄭伊娜欲言又止，表示暫時不可以透露詳情，因為已經交由律師處理，問她是否因美容意外被毀容？她開始想喊說：「有傷害，好番有啲唔係幾好，總之一個星期瘦5磅，屋企人逼我食有營養嘢，但係都冇胃口食，希望快啲好番，可以做番嘢。原本喺內地接咗啲網絡電影同話劇，仲有啲演出，𠵱家全部都唔得，上個月本來去海南島，醫生話太熱地方又唔得，我好唔開心，𠵱家全部唔做得要cancel，損失好大，好唔開心，我個人好有計劃，呢件事係我預計唔到，唔係個個人體諒你，希望真係可以完全好番晒，我原本皮膚真係好靚㗎！」
採訪：非非
攝影：陳志嵐