首次參加區議會選舉就喺馬鞍山富龍一擊即中，打敗建制地頭蟲嘅「民主黨李英愛」曾素麗Yen，贏咗選舉卻輸咗身材，佢同八方茶敍時透露近日因為頻頻慶功，肥咗10磅！
為咗keep fit，阿Yen最近夜晚都頻頻喺馬鞍山跑步，連跑5日後，已減咗1磅，嚟緊會繼續努力。被街坊稱為「大長今」嘅阿Yen，原來大學去韓國旅行時真係試過着韓服，仲喺八方要求下，首次同大家分享當年靚相，唔知大家又覺得似唔似？
其實阿Yen成功當選後，近日已物色到議辦舖位，1月將正式開張服務街坊。民主黨仲推出新短片訪問呢位黨花，有興趣嘅話可以去民主黨facebook專頁睇睇。