作為一個打工仔，我都想時時刻刻擁抱正能量，每天精神抖擻、一腔熱血的上班去！不過望一望現實情況，睇睇新聞，再睇睇銀行戶口，你就唔難明白，點解咁多人「背棄了理想」。年尾最興就係數榜，今日就同大家數數「香港打工仔年尾五大傷心事」！
第一灰：
香港人奪「亞洲OT王」名銜，真係除咗講恭喜之外都唔知講咩好。有調查就話，香港打工仔OT時數冠絕亞洲，其中14%每周加班超過15粒鐘，即係相當於每星期返足7日工！
更灰嘅係，你披星戴月放工歸家休息去，點知開着電視就心碎。你唔小心睇到ATV，你諗起張家輝句：「仆你個X！亞視嚟嘅！」然後死死地氣轉去TVB，見到個喜感爆燈嘅洪永城，認真扮惡鬧岑麗香，你開始嗅出膠味，灰機的你決定上網loop返《毛記電視》個專家Dickson認真扮失戀廣告，So Grey……
第二灰：
你明知第二日要返工，但你知道，每日真正屬於自己嘅時間，就係收工後同瞓覺前，撒瑪利亞會呼籲珍惜生命，所以你好夜瞓，增加享受人生嘅時間佔比。結果係……第二日唔知醒。你狗衝去地鐵站，不過命運之神最鍾意玩死你，往往喺你最趕時間先嚟壞車。
你用等車呢15分鐘時間去思考人生，你開始明，港鐵係想教你「一吋光陰真係一吋金」。年年加價，再一炮過用844.2億元去起高鐵，錢越多，delay more。
超時冇補水 仲話要交稅
第三灰：
大地為夏天帶來雨水，工作為銀包帶來薪水。不過今年首11個月，每名打工仔因為MPF平均輸4,800蚊。基金佬話「今年有股災呀」，你問：「但都有過牛市」，佢又話：「投資價格可升可跌」，問題係，投資明明非你所願，但點解自己承擔損失。年尾輸錢你已經好唔開心，今年仲要冇得扣稅，望住個綠色信封，你心情開始有啲激動：超時冇補水，膠鐵delay冇回水，但薪水無端縮水！然後仲要交稅！只能說：哪有錢？
第四灰：
你上網睇新聞，發現全世界都講緊樓價跌。你發現你好彩過好多人，積蓄終於夠畀一間豆腐膶咁大嘅樓嘅首期。你想趁低入市做業主，點知你睇新聞發現，銀行未必估足價……樓價升，你買唔起樓；樓價跌，你都買唔起。原來要真正了解自己有幾窮，其實係喺樓價跌嘅時候……
終極灰：
如果你係幫亞視或港交所（388）資料研究部打工……
完
千頌C
http://fb.com/winbigwok
本欄隔周三刊出