由新民黨主席葉劉淑儀同外號「拔甩陳」嘅行會成員陳智思做聯席主席嘅海上絲綢之路協會，噚日正式成立青年機遇委員會，主打幫青年人喺一帶一路相關嘅東南亞國家搵實習機會喎，總之政府做唔到嘅嘢，就由佢哋做。
葉劉同拔甩陳嘅新搞作係喺明年暑假期間，喺一帶一路嘅東南亞國家例如新加坡、馬來西亞等，提供約100個、為期4至8星期嘅實習職位，提供職位嘅企業來頭唔細，有中電、中銀、嘉里等等。拔甩陳係泰國華僑，佢家族喺泰國有好大生意，當然佢都幫手提供實習職位啦。佢哋仲準備明年復活節期間舉辦福建泉州考察團，呢個同實習活動唔同，主要係觀光性質。葉劉提醒大家，啲實習職位真係要做嘢㗎。