【本報訊】政府硬推《版權（修訂）條例草案》，身兼深圳政協的網絡紅人Eminleo也反對草案。他形容條例就像「叫網民喺籃球場踢波」，狹小創作空間或嚇怕有志入行的年輕人。立法會即將表決草案，他將乘勢推出成名作《爆笑字幕版－足球小將》續集，向政府展示二次創作的力量。
Eminleo在YouTube的《九唔搭八》及《足球小將》系列採用多套日本卡通片段，配以港式評論和對白，部份短片點擊率高達200多萬人次。他稱至今仍不清楚其作品會否構成侵權，「我屬於普通網民，係咁意睇吓條例，冇深究」。他批評政府說法含糊不清，「好似中文教授教人講英文……假如政府有心整，應該整條惡搞片，指出呢個位用得，嗰個位唔用得，將法律轉化成網絡語言」。
「叫網民喺籃球場踢波」
政府多番強調，草案釐清現行《版權條例》灰色地帶，Eminleo反指網民正是懼怕政府有搬龍門前科，施加含糊規則，「大家拎住個波，喺冇邊界草地玩花式足球。如果有界有規則有龍門，係咪等於唔可以踢波？又唔係。但係政府條界係矇㗎囉」。他又不滿豁免範圍太窄，「叫網民喺籃球場踢波，就係唔fair嘅創作空間」。
Eminleo被傳媒發現今年5月成為深圳政協，自稱是建制內的反對派，「我曾經提出深圳應該好似上海開放網絡，唔使翻牆就睇到一啲外國網站。（有否被接納？）我都唔知呀，純粹提吓，講咗好過冇講」。不過Eminleo對港府深表同情，相信草案部份條文有存在意義，然而政府往績太差，不獲網民信任。
若草案通過，已有創作班底的Eminleo認為轉型不是問題，只是苦了有志投身創作的年輕人，因惡搞屬低門檻創作，毋須太多資金及技術，「感覺上政府好似係打擊緊創作思維，連低門檻創作都收窄。政府成日叫人整高科技高技術，唔畀佢哋行第一步，點伸延去高門檻？」他會考慮出席今晚集會，並於日內推出新作。
■記者白琳