這天下午12位參加國際騎師錦標賽的好手，濟濟一堂出席記者會造勢，各人在紀念品上簽名，準備喺周三(9日)比賽當晚送畀馬迷，所有騎師亦逐一接受訪問，而馬會CEO應家柏，向每位參賽好手，送贈一頂印有所屬國家或地區圖案的騎師帽。
唔知馬會係咪計漏咗騎師嘅身高，所有騎師上台攞帽嗰陣，都有一位專用模特兒傍住。其中美國代表伊偉舵較矮，但馬會安排畀佢嘅模特兒卻太高，相映成趣，台下好多人都笑咗出嚟。而英國代表蘇兆輝情況亦相若，個MODEL高佢差唔多個半頭位，真係唔多襯。
不過伊偉舵好大方，冇尷尬之餘，仲自備自拍神棍，同應家柏及模特兒合照留念，一貫美國人嗰種輕鬆冇架子。而伊偉舵在美國曾參加類似「與星共舞」的電視節目，呢日佢喺台上亦應邀施展舞步踢腳擺pose，左踢右踢，場面愉快。