房協喺北角丹拿山嘅富貴長者屋雋悅，噚日開始接受60歲或以上嘅銀髮一族申請。單位雖然只租不賣，但間隔四正、裝修齊全，簽咗租約就可以即刻入住，部份仲望到海景。雋悅另一賣點喺屋苑內有齊私家診所、復康中心、室內恒溫泳池等設施，私隱度極高，噚日示範單位一開放，就吸引大批富貴長者去睇樓，唔少人有私家車接送㖭。
八方現場仲見到好耐冇公開露面嘅手袋黨高官、前公務員事務局局長俞宗怡嘅蹤影。現年63歲嘅D姐10點半左右同兩個朋友一齊去雋悅睇樓，冇見一排風采依然，面露微笑，一支箭衝咗入去，一睇就睇咗兩個半鐘。離開時記者問佢係咪有興趣租番個單位住吓？佢只係一直微笑，然後衝上的士離開。