旅遊業議會噚日改選主席，現任主席胡兆英卸任，經過投票，由現任副主席兼康泰旅行社董事總經理黃進達Jason以21票，大比數贏只有8票嘅金怡假期董事長葉慶寧，當選主席。
呢位80後太子爺含住金鎖匙出世，但都算由低做起，2003年入康泰跟頭跟尾，八方當年親身見證啲老臣子都會點佢……唔係，係教佢至真！佢當時怕怕醜醜，直至處理菲律賓人質事件，鏡頭前後表現沉着，4年前終於坐正做董事總經理，爸爸黃士心半退休做吓豪華導遊乘機旅行。Jason話首要工作係團結業界、推措施令旅客對香港重拾信心，以及面對新成立嘅旅遊監管局。落選嘅老前輩葉慶寧參選過旅議會主席及立法會㗎，屢敗屢戰其志可嘉。佢為業界咁搏命，八方都要為佢加油呀！